Húlahúla í árslok

Jólin

    

Heimsóknir, fjölskylda, vinir, kaffi, konfekt, Quality Street, hangikjöt, uppstú, bleikt kjöt, jólaboð, samvera, grautur með möndlu, myndatökur, lestur, músíkk, kanellykt, negulnaglar í mandarínum, jólaglögg í potti með útbelgdum rúsínum, jólabréf og kort, gjafir, ljós, snjór, upplýst kirkja, kerti, jólasveinar. Það eru til dæmis jólin.

Jólakveðjur til handa einstöku fólki

Elsku bloggvinir mínir, allir sem einn, og ein sem öll!

Ég óska ykkur skemmtilegra jólahátíða um leið þakka ég ykkur einstaklega gefandi bloggsamveru hér á Moggablogginu.

Þið hafið verið mér innblástur og hugsanafóður.  Hlakka til að hitta ykkur aftur að hátíðum loknum... eða áliðnum!

Það er þó sannarlega til einhvers að hlakka!

 

Sálarnammi

     

Þó að lífið snúist um tónleika, kaffiboð, matarveislur, hittinga, fótsnyrtingar og jólagjafakaup þessa dagana, þá þarf líka að vökva hugann. Ég hef vökvað hann undanfarnar vikur með Bíbí hennar Vigdísar, Harðskafanum hans Arnaldar og Rimlum hugans hans Einars Más. Er svo að byrja á Óreiðu á striganum hennar Kristínar Marju. Merkilegt hvað maður ávarpar þessa höfunda kumpánlega, svona á síðkvöldi og þó ekki svo merkilegt þegar á það er litið, að þeir hafa verið samtíða manni í vöku og draumi um skeið. Þessar bækur eru allar ágæt lesning, einkum og sér í lagi bernskukaflinn í Bíbí, sem er svífandi snilld. Engin þeirra lauk þó upp augum mínum fyrir nýjum sannindum, ellegar setti þekkta reynslu og teikn í nýtt samhengi. Ég bíð eftir að Jón Kalmann geri það og svo auðvitað Kristín Marja. Nú myndi ég hella mér í Óreiðuna ef ég þyrfti ekki að vakna eldsnemma. Vinnan slítur daginn alltaf doldið í sundur. Ég ætla samt að handfjatla bókina aðeins og smjatta á fyrstu setningunum. Nammi.

Skrafað við vin

Ég látti fiskinn allan oní vasana mína

Ha, af hverju?

Aþþí bara hann var ógissla vondur

Hvernig gastu það og látið engan sjá?

Ég ger´ða bara þegar fullorðinna fólkið var að tala

Og allir héldu að þú værir búinn með matinn allt í einu?

Já, þá fékk ég nefnilega ís með karmulu

En hvað gerðirðu svo við fiskinn í vösunum?

Ég látti bara buxurnar í þvottavélina hennar mömmu

 

 

Aðventa

      

Hvernig mér, holdtekju lífsnautarinnar, hefur tekizt að koma í veg fyrir að ég næði áttatíu kílóum fyrir 10. desember, sýnir ekkert annað en járnvilja, hörku og einstakan karakterstyrk af minni hálfu. Om jeg må sige det selv. Nú eru að baki hvorki meira né minna en fimm aðventuveislur með matarglásum ógurlegum - og ómældri mæru. Aukinheldur nokkur kaffiboð, þar á meðal tvö með kakói og rjóma. Og er þá ótalin málverkasýningaropnun Katrínar með kakói, rjóma og kökum. Ég bakaði eina sort (haframjöls/kókos/sjokko) um daginn, aðallega til að geta sagt að ég hefði bakað og til að fá lykt í húsið. Af fjörutíu kökum, sem út úr uppskriftinni komu, át bakarinn sjálfur þrjátíu. Lyktin dugði í einar tíu mínútur.

Af öllum þeim matarsortum sem ég hef komist í tæri við undanfarnar veisluvikur, ber þessar hæst:

(1) Ofnbökuð kæfa Ólínu  (heit lifrarkæfa sem hefur þau áhrif, að maður heyrir tónlist af himnum og gott ef ekki englaraddir). (2) Friggadellur Lone (algerlega harðbannað að kalla þetta kjötbollur, þetta eru hinar einu sönnu dönsku dellur, sem enginn getur gert nema að hann hafi drukkið danska móðurmjólk). (3) Kengúrukjöt á Silfri (Hótel Borg) (hér er um að ræða einstakt bragð og einstaka blöndu, sem er engu lík, nema ef vera skyldi kengúrukjöti). (4) Hafrakex Sólrúnar, með döðlu/súkkulaði/rjómamauki (frumlegt, bragðgott og frekar hollt, en einmitt þessvegna borðar maður gjarnan fimmfaldan skammt). (5) Reyktur silungur Elsu (þetta er ævintýralegur góður silungur, allt annað silungskyns verður hálf dapurt í samanburðinum).

Ó, guð, þakka þér fyrir allan matinn.

Skrafað við vin

Akkuru hlustir þú á svona leiðinlegt úbart? 

En, elskan mín, þetta ER svo skemmtilegt 

Það þykir ekki mér 

Þú skilur bara kannski ekki allt sem er sagt .... 

Ég skiljir alveg að konan sagði heimskur er höfuðlaus 

Heimskur er höfuð -stór – þetta er um málshætti ... 

Heimska úbart

Uppáhald

Skrafað við vin

 

Mér finnst pissulykt góð

 

Það er nú gott

 

Nei, það er ekkert gott

 

Nú?

 

Aþþí bara mamma segir að það sé skrýtt

 

Meinarðu skrýtið?

 

Nei skrýtt

 Ok

Myndlistarsýning Katrínar

 

Hvet alla til að skoða sérstaklega heillandi myndlist sem nýtur sín mjög vel í fallegu umhverfi veitingarstaðarins á Hótel Reykjavík Centrum, Aðalstræti 16. Sýningin verður opin í nokkrar vikur og kaffihúsið er opið frá kl. 11.00 til 23.00 alla daga. Listamaðurinn heitir Katrín Snæhólm Moggabloggari með meiru.  Ég var svo heppin að vera á opnun þessarar sýningar sl laugardag. Þar var skemmtileg móttaka með kakói og kökum, kertaljósum og ljúfum tónum. Listamaðurinn stóð þar og tók á móti gestum sínum með sína yndislegu fjölskyldu með sér. Þarna hitti ég góðar bloggvinkonur í fyrsta skipti og það var einkar ljúft að spjalla og spekúlera með kakó í bolla.