Helgarferðin

Mánudagur, 15.9.2008

Ég fór í helgarferð í dag.

Labbaði heilan helling í rigningu og roki. Komst í hús og rúllaði mér í rúllustiga og gekk deild úr deild og frá sófa til sófa. Fékk mér svo að borða á restaurant. Lax í afskaplega óráðinni sósu með mauksoðnum kartöflum og grænmeti sem líktist papriku og belgbaunum að ytra útliti. Kaffi og súkkulaðikrem með nokkrum kökukornum á eftir. Skoðaði svo enn meira og labbaði áfram, labb, labb, labb. Margt bar fyrir augu og m.a. fékk ég ódauðlegar hugmyndir um flokkun og geymslumöguleika á enn meira drasli. Fékk mér ís og pylsu. Beið við kassa og fór aftur út í rok og rigningu. Nema að það hafði stytt upp og regnbogi einn skæslegur og rígmontinn teygði sig yfir svæðið.

Helgarferðin var í Ikea.

Flokkur: Bloggar | Facebook

Athugasemdir

Love u 2...

Fanney Björg Karlsdóttir, 15.9.2008 kl. 00:13

Regnboginn var hreint yndislegur!

Mín ferð var í Perluna, súpu og brauð og síðan ekki söguna meir.

www.zordis.com, 15.9.2008 kl. 00:13

Ég öfunda þig ekki af Ikeaferð. Fer þangað helst ekki. Gangarnir eru svo langir og svo verður maður hálf loftlaus.

Guðrún Þóra Hjaltadóttir, 15.9.2008 kl. 00:46

Hvað keyptirðu margar sleifar???

Sólveig Hannesdóttir, 15.9.2008 kl. 17:46

Ég elska svona Ikeaferðir. Þær eru mjög sjaldgæfar og því hver ferð sem ný helgarferð. Ég keypti by the way 3 sleifar saman í bandi (eins og fiskarnir á bryggjunni hér í den) og þær kostuðu heilar 75 krónur. Þetta hélt ég að væri ekki hægt á byggðu bóli, hvað þá í Garðabæjarhrauni.

Guðný Anna Arnþórsdóttir, 15.9.2008 kl. 21:14

Mér finnst yfirleitt gaman að fara í Ikea. Þar finn ég mér góðan stól eða sófa og sit svo og horfi á alla sem ganga um. Síðan eru það ALLTAF sænskar kjötbollur í lokin í bland við ,,Íkeanska" andagift.

Líklega var ég að hjóla í rigningunni milli mín og þín og þín og mín meðan þú rambaðir um ranghalana í Garðabænum og hrærðir í pottum með hagsýnum sleifum.

Já. Það var gaman að fá bókina í hendur í dag. Ég var kvíðin fyrst en síðan bara afskaplega glöð. Bókabúðin Iða stendur mér til boða á sunnudaginn kl. 5-7. Þá býð ég upp á einhverjar léttar veitingar og hún Draumey frá Svíþjóð ætlar að lesa með mér. Ég hlakka bara til. Ég ætla að auglýsa þetta á síðunni minni. Vilt þú láta boð ganga meðal fólks sem þú þekkir. Vona að þér hafi líkað bókin.

Faðmlag

Unnur Sólrún (IP-tala skráð) 15.9.2008 kl. 21:30

Líkar bókin?? Ég er dolfallin. Get ekki beðið eftir að komast undir sæng með hana og sofna með hana á nefinu. Ástar-ástarþakkir fyrir mig og mína, elsku skáld- og vinkona.