Bloggverjar Íslands

Frá því að bloggið fór að festa sig í sessi á Íslandi sem samskiptavettvangur, hafa ágerzt umræður um  ágæti hinna ýmsu bloggara  og vefsvæða.   Þetta minnir á gamla ríginn sem var hér í eina tíð á milli Reyðfirðinga og Eskfirðinga. Sá rígur gekk út á það hvort þorpið hefði að geyma óupplýstara, sóðalegra, ljótara og  heimskara fólk.  Eskfirðingar kölluðu Reyðfirðinga „krónuseðla“ og Reyðfirðingar Eskfirðinga eitthvað annað, sem ég hef sennilega kosið að muna ekki. Umræðan fór sjaldnast upp fyrir það plan sem lýsingarorðin hér að framan gefa tóninn um.  Ef fólk flutti á milli staða, þurfti það að sanna sig í talsverðan tíma, áður en það hafði hreinsað af sér óorðið af hinum fyrri bústað sínum. Síðan var það tekið algerlega í hópinn, enda farið á Reyðarfirði, nú eða Eskifirði.  Þetta var auðvitað sambland af gamni og alvöru, mestan partinn bara skemmtilegt. Bloggsamfélagið á Íslandi er litað af svipuðum ríg. Ég hef spurt fólk út um víðan völl og lesið mér til á bloggsíðum landans, hvar bloggverjar  tjá sig um aðra slíka, gjarnan á „hinum“ svæðunum.

Mér virðist að í grófum dráttum skiptist bloggverjar í Moggabloggverja og „aðra“  bloggverja.  Þessir aðrir eru á hinum ýmsu vefsvæðum, íslenzkum sem erlendum.  Miklar frústrasjónir hafa verið viðrarðar hjá þeim sem ekki tilheyra Moggabloggi um heimsku þeirra síðarnenfdu, þröngsýni og fánýti skrifa þeirra, svo ekki sé nú minnst á vöntun á stílsnilld og réttritun. Þannig segir einn, að bloggverjar Mogga einkennist af heimsku, yfirborðsmennsku og hugmyndavöntun. Þeir þurfi að hafa fréttir til að styðja sig við, því þeim detti ekkert í hug.  Þeir éti jafnvel fréttir orðrétt upp og bæti svo við 3 – 4 fátæklegum orðum til að lýsa skoðun sinni. Sumir hafa tjáð sig um sorgarblogg og tilfinningaklám hjá Moggabloggverjum, - og þykir ekki par fínt.  Annar telur Moggablogg sérlegt „pseudo-pepp“ og þar sé „já – fólk“ í meiri hluta, en á örðum svæðum sé meira diskúterað og meira „wit“ komi fram í orðræðu og skoðanaskiptum. Einn segir, að þetta sé einfaldlega bara efri stétt (ekki-Moggi) og neðri stétt (Moggi). Moggabloggverjar hafa lítið varið sig, sýna að mestu æðruleysi og þolinmæði, en þó má finna varnarræður og uppnáms-skrif vegna þessara skoðana.  Þannig segir einn að menntamenn, skáld  og háðfuglar skrifi síður á Moggabloggi , sem betur fer, en þar sé hins vegar venjulegt fólk með venjulegar skoðanir og áhugamál, sem deili saman hluta af pælingum sínum. Það eigi fyllilega rétt á sér eins og önnur skrif á slíkum miðlum. Einn segir, að Moggabloggið sé einlægara en önnur blogg og meira svona „innlit í eldhúsið yfir bolla af kaffi“, hvar á öðrum bloggum sé beittari þjóðfélagsumræða.  Annar segir að það sé frelsi að skrifa á Moggablogg og fá jákvæð komment þó svo að maður hafi ekki verið að finna upp nýjan vinkil á afsæðiskenningunni.  Þetta sé einfaldlega bara gefandi félagsskapur í netheimum.

Einn afkimi bloggsamfélagsins er hópur fólks sem gæti talist til sokkabrúða og trölla, eins og skilgreint er í Wikipediu (sjá hér að neðan). Þar er ýmist um nafnlausa bloggverja að ræða, sem ausa úr skoðanaskálum sínum til hægri og vinstri, í þeim tilgangi að vekja tilfinningaleg viðbrög, og hins vegar bloggverja sem koma fram í nafni málstaðar eða tiltekinna félagasamtaka. Til er að verða fræðigrein sem skilgreinir og metur hvatir að baki hinna ýmsu birtingarmynda netskrifa og verður fróðlegt að fylgjast með því.

Samantekt, eftir samræður við allnokkra einstaklinga og flettingar í gegnum blogg landans: Moggabloggverjar eru alþýðlegir og lausir við kaldhæðni, flestir skrifa af hjartans einlægni og einbeitt og meitluð skoðanaskipti eru þar lítil, en stuðningur þess mun meiri. Á öðrum bloggsvæðum eru beittari skoðanaskipti og kaldhæðnislegur tónn í hávegum hafður. Þar er hipp og kúl að vera háðskur, beittur og umfram allt, gáfaður. Á þeim svæðum kallar maður Moggabloggverja einfaldlega plebba.

Þetta er óvisindaleg úttekt í hlutlægari kantinum, mat mitt á málinu mun ég birta síðar!

Ekki er vitnað í einstaklingana sem ég ræddi við beint og ekki gefnar upp heimildir úr bloggheimaferðalagi mínu.

 

Athugasemdir

[Þorsteinn Valur Baldvinsson, 11.5.2008 kl. 12:58]

Þetta er þarft rannsóknarefni og á eflaust eftir að vera áhugavert fyrir ýmsa að lesa hvað fólk er að skrifa og segja.

[Grétar Rögnvarsson, 11.5.2008 kl. 13:23]

Hæ kæra bloggvinkona og bara vinkona. Læt þetta nú bara hljóma svona vegna þessarar skemmtilegu greinar þinnar hér. Mér innst þetta alveg frábært þetta blogg, heyrði fyrst um þetta fyrir nokkrum árum og fannst þetta þá svolítið skrítið, að fólk væri með jafnvel dagbók þar sem allt væri látið flakka.

Ég ákvað að byrja á þessu út af vissu máli sem var í gangi heima síðastliðið haust, og á haustin hef ég svo lítið að gera er svo mikið heima. Það sem þetta hefur skilað mér er góð samskipti við skemmtilegt fólk, t.d. að fá að kynnast ykkur aftur þér og Unni hér og fleirum sem maður þekkti í den.

En þetta með ríginn hér í bloggheimum, veit ekki,i finnst sumir bara dónalegir og ættu að láta það ógert að skrifa hér og þá finnst mér nafnlaust blogg og fólk sem ekki getur kynnst sig hér ekki eiga heima í þessu. Mér finnst það sína vanþroska og hræðslu að geta ekki komið fram undir nafni. 

Eskfirðingar -Reyðfirðingar, því miður Guðný er þessi rígur enn til staðar og það er fullorðna fólkið sem heldur honum við og svo smitast ungarnir.

Þetta með bjór snafs og tilfinningarnar mjög athyglisvert, held að það sé mkið    til i þessu.

Og í gær hittust þeir Gauti bróðir þinn og Rögnvar faðir minn í jarðaförinni hans Alla, en þeir eru fermingarbræður.

[Kolbrún Jónsdóttir, 11.5.2008 kl. 15:39]

Er virkilega þessi rígur á milli bloggheima???  Ég valdi moggabloggið einfaldlega vegna þess að mér finnst það aðgengilegt og einfalt... vonandi segir það ekki allt um mig, heh

Annars ...  til hamingju með mæðradaginn 

[Heidi Strand, 11.5.2008 kl. 21:26]

Bloggið endurspeglar allt litróf mannsins. Það  sem mér ekki líkar við bloggið er slúðrið, smjaðrið og dylgjurnar. Fólk á ekki að ræða mál annarra sem hafa ekki tækifæri að bera hönd fyrir höfuð sér. Margt fólk sem talað er um les ekkert blogg.
Ég heyrði viðtal við rakara i útvarpinu hér um daginn. Hann gúglaði sjálfan sig og kom inn á eins og hálfs árs bloggfærslu þar sem hann beinlínis var svívirtur. Færslan var lesin upphátt í útvarpinu og þvílík andstyggð. Ung kona skrifaði færsluna eftir að hafa verið í greiðslu hjá manninum. Það er beinlínis hættulegt að vera í mörgum þjónustustörfum. Sérstaklega eftir bloggið kom til sögunnar, þar sem svo virðist að fólk þurfi ekki að vera ábyrgt orða sinna.

[Ásdís Sigurðardóttir, 11.5.2008 kl. 22:20]

Ég man eftir ríg á milli Akureyrar og Húsavíkur, þetta er bara svona oft með bæjarfélög.  En þetta er góð vagnavelta hjá þér, sumt væri betur óskrifað, en svona er mannflóran, hafðu það gott mín kæra.   

[Gunnar Páll Gunnarsson, 11.5.2008 kl. 23:37]

Eða Selfoss og ALLRA nágrannabæjanna! Flott framtak hjá þér. Góða nótt.

Gunni Palli kokkur. 

[Steinunn Helga Sigurðardóttir, 12.5.2008 kl. 12:41]

þetta er hin merkasta samantekt hjá þér, ég er nú svo græn að ég vissi þetta ekki , en ég er sátt við þá sem ég er í hópi með, er þetta ekki bara öll litaflóran.

hafðu það sem fallegast, við blessaður almúginn

steina 

[Guðný Anna Arnþórsdóttir, 12.5.2008 kl. 15:01]

Já, rígurinn er víða. Alveg stórmerkilegt fyrirbæri. Hann er ekki bara milli bæja, heldur lika milli bloggsvæða.

Einmitt, bloggið speglar litróf mannlífsins og það er eitt af því sem mér finnst skemmtilegt við þennan vettvang. Það er eins og annað á leiksviði lífsins, sumu er maður sammála, öðru sammála, eitt inspírerar mann og annað fyllir mann reiði, vanmætti eða hneykslan (nema allt sé í senn).

Gaman hefur verið fyrir Rögnvar og Gauta að hittast, Grétar!  

Já, Steina mín, við almúginn lengi lifum..! 

[Sólveig Hannesdóttir, 12.5.2008 kl. 23:20]

FLOTT HJÁ MINNI

[Katrín Snæhólm Baldursdóttir, 13.5.2008 kl. 18:02]

Hva segirðu..ekki hef ég orðið vör við neinn sérstakan ríg..nema þennan vonda hálsríg sem ég vaknaði með í morgun. Það þýðir örugglega að ég sé omenntaður plebbi fyrst ég rita um það á moggablogginu..hehe.