Esja

                 

Ég á í ástarsambandi við Esjuna.

Ég hef séð hana á köldu síðdegi, þegar fokið er í öll skjól fyrir mannfólkinu á leið heim úr vinnunni. Þá er hún hnípin og þögul, lætur ekkert uppi.

Ég hef séð hana í vetrarham, þegar hún faldar hvítu og er að springa úr stolti. Þá reigir hún sig yfir heiminn og segir ha, ha, ha.

Ég hef séð hana um júlínótt, eftir næturdjamm, þegar kvöldið og morguninn mætast á henni og hún speglar sig í spegilsléttum sjónum. Þá brosir hún kankvís og segir: elsku, farðu heim að sofa.

Ég hef séð hana vafða snjóþokum um vetur, kuldalega og ógnvænlega.

Svo er hún stundum svo værðarlega hlýleg og unaðsleg á fágætum hitadögum, í sumri og sól. Aldrei samt letileg, aldrei alveg sama.

Hún vakir yfir mér. Ég vaki yfir henni. Hún mun samt vaka lengur en ég.

Hún er allskonar, ég er allskonar.

Hvað er hægt að vera í lifandi sambandi við fjall.

              

Athugasemdir

[Hrönn Sigurðardóttir, 8.4.2008 kl. 23:24]

Ég á í samskonar sambandi við Hengilinn

[www.zordis.com, 9.4.2008 kl. 00:03]

Það er sko hægt að vera í lifandi sambandi við Fjall "trúðu mér" ...

Esjan er undraverð og yndisleg  

[Fanney Björg Karlsdóttir, 9.4.2008 kl. 11:12]

"finnst þér ekki esjan vera sjúkleg
& akrafjallið geðbilað að sjá
ef ég bið þig um að flýja með mér
til omdúrman þá máttu ekki hvá"....

Ég er að þróa svona samband við Heklu....... allveg yndisleg......

[Steinunn Helga Sigurðardóttir, 9.4.2008 kl. 16:24]

þetta er fallegt og mikill kærleikur frá þér til hennar. ég skil það vel, er ísland ekki líka hún ?

Blessi þig

steina

[Marta B Helgadóttir, 9.4.2008 kl. 23:18]

Það er Þórsmörkin sem er ástin mín

[Katrín Snæhólm Baldursdóttir, 10.4.2008 kl. 12:51]

Ég held ég hafi hætt að elsk´ana þegar hún greip mig í klettakrumluna sína og hélt mér þar fastri og starfri..hræddari en nokkru sinni áður. En þegar á tindinn var komið gat ég fyrirgefið henni kastið og heimtaði þyrlu til að flytja mig heim.

En svona í fjarskanum sé ég fegurð hennar og grobba mig roggin eins og sumir..Bendi með hendi og segi..Sjáiði tindinn þarna fór ég..og sleppi öllu öðru úr þeirri sögu.

Þú og Esjan

Ég og Esjan 

[Sólveig Hannesdóttir, 10.4.2008 kl. 15:13]

Elsku frænka mín, lyrisk ertu, svo sannarlega, ég eftir ljóðahefti, skal meira að segja selja það fyrir þig.  En þarna er ég galtóm, algerlega, fjöll snerta mig bara alls ekki. Ég er meira að segja svo ófyrirleitin, að mér finnst að vel megi færa hana. Er semsagt alger materialisti eða hvað?? Ég vil eiga í sambandi við eitthað annað en fjall, og mér finnst hún mætti vera aðeins minni.   (Alltof djúpt fyrir mig)

[Steingerður Steinarsdóttir, 11.4.2008 kl. 10:38]

Alveg sammála þér með Esjuna. Ég hef líka gengið á hana af og til og þegar maður er lafmóður og illa haldinn í brekkunum er hún samt virkilega aðlaðandi.

[Marta B Helgadóttir, 13.4.2008 kl. 10:25]

Sæl Guðný Anna. Nú er bókaspjallið hafið á síðunni minni

[Bjarney Hallgrímsdóttir, 13.4.2008 kl. 19:40]

Sorry, en mér finnst Esjan eiginlega bara ekkert fjall, meira bara svona hóll,  ekki þegar maður hefur alvöru fjall hinum megin við fjörðin, tæp 1000 m fjall. En skil þig samt með að þykja vænt um fjöllin. Var einmitt í miklum samræðum við pabba í gær,  hann var svo hneykslaður að ég vissi ekki alveg hvað öll fjöllin hérna í kring um Fjörðin fagra heita  og var svo í dag í Oddskarði og þá var einmitt verið að pæla í því hvaða fjall væri Magnúsartindur, ég og fleiri bentum á ákveðið fjall - en svo kom í ljós að við höfðum rangt fyrir okkur, þetta var víst Goðatindur sem við héldum vera Magnúsartind - en ég vissi þó hvar Magnúsarskarð er og Oddsskarð líka  = Austfirsku alparnir

[Grétar Rögnvarsson, 13.4.2008 kl. 21:50]

Guðný Anna. Hólmatindur eða Esjan???????

[Guðný Anna Arnþórsdóttir, 14.4.2008 kl. 21:17]

Mikið er gott að þið skiljið svona persónulegt samband við fjall. Ég er fjöllynd í fjalla-ástarmálum og á líka kærasta og kærustur fyrir austan og úti í Colorado. Ekki segja.