Af konu

Rjúpnahæðin blasti við. Konan ætlaði bara að snúa við á snjóblautum, óræðum veginum, þegar óbyggðirnar blöstu við í upphæðum Kópavogs og ljóst var að hún hafði ekki fundið rétta götu. Þá sökk bíllinn utan vegkants, með svona skvamphljóði, blllllúppp, það minnti á rússnesku. Spól, spól, ekki sjéns að hnika bílnum. Konan hringdi í besta vin sinn sem kom með svo flottan kaðal að konan ætlaði ekki að týma að binda hann milli bílanna. Það var nú gert samt og upp fór bíllinn, rúúúúmmm, búúúmmm. Þetta var á Valentínusardaginn. Það var mjög rómantískt að lemjast um í rigningunni á Rjúpnahæðinni. Tilgangurinn með ævintýrinu var að fara í heimsókn til einnar alveg óhuggulega skemmtilegrar konu. Hún beið með matinn fyrir hrakfallabálkinn - og allar hinar konurnar þurftu að bíða líka og voru orðnar aggressívar af hungri þegar kona úr helju heimt birtist á svæðinu. Það var engin samúð, bara "á borðið með matinn!!!" Eða næstum svoleiðis.

Kona sat í pallborði í Háskóla Íslands meðal annarra geðsinnaðra, geðríkra, geðreynslumikilla kvenna og sagði ungum og upprennandi hjúkrunarfræðingum frá staðreyndum lífsins. Og geðsins. Öldungis bara alveg ágætt. Konan varð þó svolítið skrýtin innumsig þegar hún uppgötvaði að þessir nemendur hefðu tæpast verið fæddir þegar hún  útskrifaðist úr þessum sama háskóla.

Það er Þorrablót framundan og konan á leið þangað. Hún er um það bil að renna frá húsinu á sjálfrennireið sinni, er hún man eftir rauðvínsflöskunni sem hún ætlaði að taka með og skreppur á spariskónum inn. Flaskan þrifin, út skal haldið aftur, orðin alltof sein, ó, guð. Á leiðinni út rennur konan snyrtilega á þröskuldinum og skellur aftur inná náttúruflísarnar með miklum dynk. Mokkakápan baðast í volgu blóði og ögn kaldara rauðvíni. Hvílíkt rauðvíns-blóðbað. Besti vinur konunnar var kvaddur til og plástraði hann allt fagurlega í bak og fyrir og litaði nokkur handklæði og moppur bleik. Á blótið var haldið með allt plástrað í bak og fyrir. Það eru enn marblettir hér og þar á konunni, - og Mokkakápan er skjöldótt.  Enga brandara, takk.

Það er fundur í einum af mörgum félögum konunnar og hún horfir á myndband um meðferðaraðila einn, sem félagsmenn bera ómælda virðingu fyrir.  Konan lifir sig svo inní myndina, að óskeikult tímaskyn hennar brenglaðist og allt í einu höfðu liðið þrjú korter. Brá henni svo mjög  að hún skráði þetta vandlega hjá sér. Dagurinn sem hún gleymdi sér um sinn og hvarf á vit annarra heima. 

Það er kaffi með vinkonu á kaffihúsi. Það er kaffi úr æpandi og spúandi maskínu og góð eplakaka. Það er eitthvað svo sjarmerandi að sitja við mátulega sjúskað borð og horfa útum glugga í bláleitt, blautt vetrarlegt síðdegi í borg við norðurskautsbaug.  Expressóhvinurinn í loftinu, lágvær salsatónlist í hátalara, í svoleiðis argasta ósamræmi við stemminguna í reykvískum hversdagsleika. Lykt af blautum úlpum og skinkusamloku sem var í örbylgunni. Fegurðin býr stundum ekki bara í fjöllunum.

Það er brunch hjá vinkonu á sólríkum sunnudegi. Konan hittir þar fólk sem hún hefur aldrei séð. Gaman að virða það fyrir sér, hlusta á bak við orðin og fá smátt og smátt heildarmynd úr þúsund smáatriðum. Gaman að verða aldrei leiður á slíku. Þó að konan segi stundum að allt væri svo ágætt, ef væri ekki allt þetta fólk.

Það er heimsókn til vina sem hafa eignast nýtt barnabarn. Jemundur, hvað fólk getur lifað sig inní ömmu – og afahlutverkið. En barnið er yndislegt og líkist konunni talsvert. Allavega hárið. Hún heitir Embla og er nýjasta vinkona hennar.

Það eru ný blöð á hárgreiðslustofunni. Hvílíkur andlegur niðurgangur og lágkúra. Samt les konan þetta af áfergju og skammast sín ekki einu sinni. Fær líka soðið kaffi frá í gær, en þar sem konan er alin upp á síldarplani og spítala er hún öllu vön. Og þykir meira að segja vont kaffi best. Hárgreiðslustofan er partur af lífi konunnar síðustu 20 ár. Hvað hún elskar þessa stofu, blöðin og soðna kaffið. Það er hins vegar einhver misskilningur sem birtist henni í speglinum, einhver allt önnur kona sem situr þarna í einskærum misgripum. Farin að líkjast mömmu hennar á efri árum, þó ekki jafn falleg og blíðleg.  

Framundan hjá konunni, til dæmis: Konung- og drottningarleg móttaka einkadótturinnar sem er að koma í snöggfrí frá útlöndum.  Saumaklúbbur í Skuggahverfinu. Fjölskylduafmælisveisla á laugardaginn. Þær eru lang-skemmtilegastar, enda skemmtilegasta fólk á byggðu bóli sem verður þar.  Það er fólk sem er ekki þjáð af geðprýðisröskunum. Skíðaferð til Austurríkis.  Londonferð – um páskana. En núna: Himnaríki og hvelvíti eftir Jón Kalman. Bókina þá myndi konan kalla tilfinningalega og listræna upplifun. Og ekki orð um það meir.  

Athugasemdir

[Svava frá Strandbergi , 22.2.2008 kl. 01:24]

Skemmtileg lesning og vel skrifuð.

[Hrönn Sigurðardóttir, 22.2.2008 kl. 10:37]

"Það er fundur í einum af mörgum félögum konunnar og hún horfir á myndband um meðferðaraðila einn, sem félagsmenn bera ómælda virðingu fyrir.  Konan lifir sig svo inní myndina, að óskeikult tímaskyn hennar brenglaðist og allt í einu höfðu liðið þrjú korter. Brá henni svo mjög  að hún skráði þetta vandlega hjá sér. Dagurinn sem hún gleymdi sér um sinn og hvarf á vit annarra heima" 

Þetta fannst mér bezt - þetta kemur stundum fyrir mig líka.

En þetta hafa verð viðburðarríkir dagar hjá þér konutetur. Eigðu góða og slysalausa helgi. 

[Steingerður Steinarsdóttir, 22.2.2008 kl. 11:16]

Ég lifði mig inn í þessa lesningu og naut hennar í botn.

[Ásdís Sigurðardóttir, 22.2.2008 kl. 15:09]

Skemmtileg lesning og margt að gerast hjá konu.  Eigðu góða helgi með skemmtilegasta fóli í heimi 

[Hrönn Sigurðardóttir, 22.2.2008 kl. 19:52]

þarna trúi ég að Ásdís eigi við fólk.....

[www.zordis.com, 22.2.2008 kl. 20:26]

Hehehehehehe ..... Kanski meinar Ásdís  = fól =  Ísmeygilegur karlmadur .....

(er ekki búin að lesa og kem á eftir)

[Hrönn Sigurðardóttir, 22.2.2008 kl. 21:19]

:) hugsanlega meinar hún það......

[Guðný Anna Arnþórsdóttir, 23.2.2008 kl. 00:16]

Ég held að hún Ásdís mín meini nú bara fólk .... Hún er ekki það meinhorn að halda því fram að ég þekki einhver fól .... Hehehehe. Correct me if I´m wrong.

[Fanney Björg Karlsdóttir, 23.2.2008 kl. 22:50]

yndislegust.........var næstum búin að gleyma þessum yndislega húmor hjá konunni....

"Á blótið var haldið með allt plástrað í bak og fyrir. Það eru enn marblettir hér og þar á konunni, - og Mokkakápan er skjöldótt.  Enga brandara, takk. ".....

ég urlast...... en ég er nú bara saklaus "kleppari" í sveitinni......  

Ég verð að fara að hitta þig....... er komin með fráhvarseinkenni....manstu eftir öllum skemmtilegu slúðurstundunum okkar inn við Sundin blá........sem sagt ...hittingur óskast.....

[Marta B Helgadóttir, 24.2.2008 kl. 12:29]

Skemmtileg skrif snilldarkona!

[Kolbrún Jónsdóttir, 24.2.2008 kl. 21:03]

Mér sýnist að það sé gaman í þínum bekk:)

Ég er að koma til Íslands um páskana og ætla að reyna að kíkja í heimsókn á SSR.... sakna ykkar allra þar:)

[Guðný Anna Arnþórsdóttir, 24.2.2008 kl. 21:53]

Já, þetta voru bara hinir viðburðarríkustu dagar. Og enn batnar það ....

Já, Fanney, ég fæ líka reglulega svona fráhvarfseinkennaköst ... sko, til í hitting whenever, whatsoever. 

Því eftir allt, hvað er betra en að hlæja í fríðra kvenna flokki?  

[Unnur Sólrún (IP-tala skráð) 24.2.2008 kl. 23:36]

Ennþá gerast ævintýr ...  Þetta er bara yndisleg kona.

Góða nótt knús elsku vinkona.

[Steinunn Helga Sigurðardóttir, 25.2.2008 kl. 16:13]

frábær skrif, lifði  mig inn í þessa dásamlegu konu ! sem datt, en fór samt.

Takk !

Bless í bili og góð skemmtun með allt sem er framundan!

steina 

[www.zordis.com, 25.2.2008 kl. 21:22]

Þessi kona á sér sterka sögu, hörkutól þó yndisljúf mær!  Takk fyrir þessa innsýn og snilldartakta! 

[Grétar Rögnvarsson, 26.2.2008 kl. 10:18]

Svartur Volvo með einkennilegu númeri renndi fram hjá mér í fyrradag, ég reyndi að vinka en var of seinn, þóttist þekkja þar konu í framsæti, hálfpartinn feginn að hún sá mig ekki því ég gleymdi því sem ég lofaði, að koma með Færeyskar bókmenntir í hverfið, man það bara næst.

[Jens Sigurjónsson, 26.2.2008 kl. 14:51]

Skemmtileg lesning.

Er a Stansted flugvelli i London tannig ad tad er frabaert ad fa eitthvad gott ad lesa.

Bestu kvedjur Jenni.

[Hdora, 27.2.2008 kl. 21:13]

rosalega gaman að lesa bloggið þitt !!! haltu áfram að skrifa svona vel og innilega !!!

[Grétar Rögnvarsson, 27.2.2008 kl. 22:56]

Rekst örugglega einhvertíma á þig í þessu góða hverfi, gisti ávalt hjá dóttur minni þar, og fæ mér oft göngu um hverfið með litla nafna minn, og á leikvöllinn með hann. Fótbolti eitthvað til að rífast útaf.

[Ásdís Sigurðardóttir, 29.2.2008 kl. 22:24]

Auðvitað meinti ég fólk ekki fól   skelltu nú rembingskossi á kallinn þinn í tilefni morgundagsins 1.feb.    X  10

[Bjarney Hallgrímsdóttir, 1.3.2008 kl. 09:18]

Skemmtileg lesning þú ert bara snillingur

[Kristbjörg Þórisdóttir, 1.3.2008 kl. 23:27]

Þú ert nú alveg magnaður penni Guðný Anna, það er frábær mannkostur að geta velst um af hlátri af sínum eigin óförum og skemmt öðrum með . Bið að heilsa Skjöldu (kápunni ha ha)...

[Berta María Hreinsdóttir, 5.3.2008 kl. 21:13]

Frábær lesning....gaman þegar fólk hefur húmor fyrir sjálfum sér. Það er augljóslega alltaf nóg að gera hjá þér við að njóta lífsins. Haltu því áfram og endilega leyfðu okkur hinum að vera með hér á blogginu

[Guðný Anna Arnþórsdóttir, 9.3.2008 kl. 13:35]

Takk fyrir kommentin, elskurnar mínar fögru.