Fimmtudagskvöldsös við kassann

Röðin var löng. Biðin ströng. Og fimmhundruð súkkulaðikaramellustangir í hillunum við kassana. Leið oss eigi í freistni og allt það. Einhver ropaði fyrir aftan. Upp gaus eitthvað í ætt við Þorláksmessuskötulykt.  Krakki í röðinni við hliðina æpti án afláts og baðaði út fjórum útlimum, á köflum sýndist mér þeir fleiri. Konan sem keypti fimmtíu poka af kartöflum (ætlar sennilega að opna veitingahús á morgun) og var akkúrat fyrir framan mig, skrifaði ævisöguna  á Visa-strimilinn.  Hún þurfti m.a.s. að hugsa sig um milli nafna. Ætli hún hafi ekki heitið þremur nöfnum og tveimur eftirnöfnum  með bandstriki á milli. Einsog þetta allt væri nú ekki nóg, gerðust þau ólíkindi, að ég missti allt úr pokanum mínum, í þann mund er ég vippaði honum hraustlega af stálborðinu. Pokinn þoldi ekki austfirsk átök og botninn gaf sig. Melónur, appelsínur, döðlupakkar og undanrenna dreifðust um forugt fordyrið. Austfirsk kona gat ekki still sig og sagði stundarhátt yfir mannfjöldann: "Andskotans helvíti." Þá sagði nærstödd frú með hneykslunarsvip: "Að hugsa sér, svona pen kona...." Ég hafði ekki einusinni húmor fyrir þessu og heimtaði nýjan poka, tuldraði um óvandaða pokagerð seinni ára og safnaði saman góssi mínu.  Æddi svo örvita útí bílinn minn. Svona líka pen kona.

Athugasemdir

[Hrönn Sigurðardóttir, 15.11.2007 kl. 22:25]

ojoj, eins og það getur verið gaman að fylgjast með "svona fólki" er álíka leiðinlegt að vera "þetta fólk"

[www.zordis.com, 15.11.2007 kl. 22:37]

"penir" austfirðingar ..... ég er nú ekki komin af neinni sérlegri pempíu að austan!  Dásamlegt að eiga djúpt hljóð sem nær niður í rassgat!  Og, vera ógisslega penn í "þokkabót"

Gæskan! 

[Fanney Björg Karlsdóttir, 16.11.2007 kl. 00:07]

hmm... ég hefði nú allveg viljað vera fluga á vegg og fylgjast með þessum ósköpum......

[Steingerður Steinarsdóttir, 16.11.2007 kl. 11:16]

Já, ég þekki svona daga þegar pokar gefa sig, hurðir skella í andlitið á manni, þröskuldar ráðast á tærnar á manni og fleira og fleira.

[Sólveig Hannesdóttir, 16.11.2007 kl. 19:26]

GAT MANNESKJAN EKKI HJ'ALPAÐ Þ'ER AÐ SETJA 'I POKANN; HVURSLAGS EIGINLEGA ER ÞETTA??????????????

[alva (IP-tala skráð) 16.11.2007 kl. 20:47]

"Andskotans helvíti" dásamlegt orð að puðra út úr sér stöku sinnum, kannast við þetta hahaha, skemmtileg lesning.

Alva Ævarsdóttir

[Marta B Helgadóttir, 16.11.2007 kl. 20:51]