Deigla og döf

Agnarögn Arnbjargar- og Frostadóttir er sætari en nokkru sinni og fer nú að missa viðurnefnið Agnarögn og skírast eitthvað annað.  Ný upprennandi stórvinkona mín kom í heiminn í gær, dóttir Svanhildar og Þórs í New York. Hún var 17 merkur. Fæðingarliðið bandaríska fór á taugum yfir stærð barnsins, en var sagt að þetta væri daglegt brauð fyrir valkyrjur og víkinga ofan af Íslandi. 

Margt hefur á daga drifið undanfarið og þeir verið pakkaðir af hinu og þessu. Ég er að tala um dag sem er til dæmis svona: Á fætur kl. 06.30. Leikfimi og sturta, morgunmatur og Moggi til 08.00 Vinnan kl. 08.15. Fundur, viðtal, símafundur, viðtal, fundur, kennsla til 15.00. Jarðarför og erfidrykkja til 16.45. Kóræfing kl. 18.00. Kórtónleikar frá 20.30 til 22.30. Heim 23.00 Aðrir dagar eru ögn rólegri en vinnudagurinn alltaf langur. Í síðustu viku var margt skemmtilegt á döf, svo sem útgáfuteiti vegna útkomu “Í felulitum” eftir kollega Hildi. Þar var skemmtilegt, bæði gómsæt mungát og afburða félagsskapur. S & S komin frá Afríku og hafa frá mörgu að segja, m.a.  Á vegum vinnunnar var haldið til Nesjavalla hvar fram fór 2ja daga vinnufundur fyrir alla stjórnendur SSR. Kvöldverður og teiti var um kvöldið, einstaklega vel heppnað og fjörugt.

Gáfumannafélagið XYZ hittist svo um daginn á Kjarvalsstöðum og drakk nokkra bolla af rótsterku kaffi til að freista þess að fá andann á flug. Ákveðið að reyna aðra tegund af drykkjum bráðlega í sama tilgangi.  Annar kvennaselskapur sem ég tilheyri, mun hittast í næstu viku. Núna næstkomandi föstudag eru ekki minna en 3 hanastélsboð sem mér er ætlað að mæta í á tímabilinu frá 17.00 til 20.00. Valkvíðinn er að ná yfirhöndinni, hjálp...

Næsta laugardag (10. nóvember)  er árshátíð SSR og við hnallþórurnar á starfsmannasviði (og hnallþórinn líka) munum sjá um forbjóð*1 fyrir aðalskrifstofuna. Annað á döf: Jólahlaðborð aðalskrifstofu, jólatónleikar Gospelsystra, jólatónleikar Frostrósa, Perlu-hittingur á Jómfrúnni og  alls kyns boð, bruðirí og bomsadeisí.   

Það er því ekki von að maður:   

               

1. hugsi nokkra hugsun til enda

2. hætti að vera rauðvíns-drykkjumaður

3. nái að lesa bækurnar sjö á náttborðinu

4. bloggi

5. teikni í nýju teikniblokkina með flottu gormunum

6. taki fram ritgerðasmíðar

7. megrist fram að jólum

8. nái smákökusortunum fjórtán                               

    *1= forbjóð = for=fyrir; bjóð=boð; => fyrirboð, þ.e. boð fyrir aðalboð ....... á ekkert skylt við viðbjóð   

Athugasemdir

[Hrönn Sigurðardóttir, 6.11.2007 kl. 22:01]

Skemmtilegir dagar framundar hjá þér!!

Skemmtileg líka neðanmálsskýringin á forbjóð

[Gunnlaugur B Ólafsson, 6.11.2007 kl. 23:08]

Lítur út fyrir að vera fjölbrytilegt   .. Skemmtileg frásögn.

[Hrönn Sigurðardóttir, 7.11.2007 kl. 18:56]

Og til hamingju með nýju stórvinkonuna.......

.....gleymdi því í fyrri heimsókn!!

[Ásdís Sigurðardóttir, 7.11.2007 kl. 20:39]

Það má kannski segja að það jákvæða við að vera öryrki er að maður eru ekki svona útstáelsi, hvorki leyfir heilsan það né að maður sé í hópi vinnufélaga, því þeir eru engir.  Skemmtu þér bara helling og rauðvín er svo sálar- og heilsubætandi.

[www.zordis.com, 7.11.2007 kl. 21:28]

Annríki hjá þér kæra Guðný Anna ....  Njóttu þess að vera til og litlu íslensku víkingarnir eru sumstaðar í heiminum verulega stórir!

Englaknús ....  Þér veitir ekki af vængjunum núna!  Svo kanski nærðu einum snjóengli til heiðurs litlu dömunum!

[Sólveig Hannesdóttir, 9.11.2007 kl. 21:44]

Svör við spurningum sem viðkomandi spyr sig og ætlast til.

No 1. Skaðlegt er að hugsa hugsanir til enda..

No.2. Mjög skaðlegt að hætta rauðvínsdrykkju snögglega, mæli með niðurtröppun..

No.3 Fækka bókunum á náttborðinu, mjög gott ráð er að hafa eina, leiðinlega (Skyldulesning), og eina skemmtilega.

[Sólveig Hannesdóttir, 9.11.2007 kl. 21:54]

No 4, Blogga án afláts,

No.5 Rissa í teikniblokkina meðan talað er í símann (Vinkona mín gerði aldeilis merkilegar teiknngar þannig),

No.6 Treysti mér ekki til að svara þessari

No.7 Heldur ekki þessari

No 8, Það er svo óskaplega mikið til af bakaríum.

Aftur á móti held ég að þú sért fínn smákökubakari, og hugsir hugsanir til enda, og sért ágætur ritgerðameistari. En ég vona að þú frestir megruninni fram yfir jól, að ég tali nú ekki rauðvínsdrykkjunni (ef hún er þá einhver?????) sem ég stórefast um að sé.

[Marta B Helgadóttir, 9.11.2007 kl. 22:51]

[Guðný Anna Arnþórsdóttir, 12.11.2007 kl. 21:56]

     Takk, elskurnar mínar, fyrir frábært komment! Ég tek sko öllum ráðleggingum. Já, ég get alveg notað vængina núna... verst hvað þeir eru eitthvað orðnir snjáðir með árunum...heheheh..hef notað þá ótæpilega á köflum. En Solla, veistu, að eitt af því sem hefur haldið geðheilsu minni svo góðri í gegnum tíðina, er að hugsa einmitt aldrei neina hugsun alveg til enda. Það er alveg geðslega bráðdrepandi.

[Guðný Anna Arnþórsdóttir, 12.11.2007 kl. 21:56]

Þetta átti auðvitað að vera frábær (í fleiritölu) komment....

[Guðný Anna Arnþórsdóttir, 12.11.2007 kl. 21:57]

Sko: ég er með nýjar neglur núna og þá bara tekst mér ekki að slá inn eina óbrenglaða setningu..þarf allavega að draga úr hraðanum.  Að ofan átti að vera í fleirtölu en ekki fleiritölu.