Er kaupstaðarferðin maya?

Sunnudagur, 3.6.2007

Í viðtali við Matthías Johannessen, sagði Steinn Steinarr eitt sinn: “Ég er uppalinn í sveit, eins og þú kannski veist, og þegar ég var lítill drengur, var ég stundum sendur í kaupstaðinn, eins og það var kallað. Í raun og veru finnst mér ég enn vera í einhverri slíkri kaupstaðarferð, langri og yfirnáttúrlegri kaupstaðarferð, en ég hef gleymt því hver sendi mig, og einnig því, hvað ég átti að kaupa.“

Í ljóðinu “Mannsbarn“ eftir sænska skáldið Nils Ferlin finnur maður svipaða hugmynd:
Þú misstir á leiðinni miðann þinn,
þú mannsbarn, sem einhver sendi.
Á kaupmannsins tröppum með tárvota kinn
þú titrar með skilding í hendi.
(Þýðing: Magnús Ásgeirsson, 1944)

Þetta vekur upp minningu um söguna af Krishna og lærisveini hans, Narada. Þeir ganga í eyðimörkinni og meistari Krishna biður Narada að sækja vatn. Narada leggur af stað fullur af vilja, en á leiðinni sér hann konu, gleymir erindi sínu, verður ástfanginn, eignast börn og buru, - og lifir sínu lífi. Dag einn kemur flóð sem hrifsar konu og börn Narada með sér og sjálfum skolar honum á land við illan leik.. Sem hann nú bjástrar við að ná andanum eftir flóðið, nær dauða en lífi, heyrir hann í Krishna, sem segir: “Barnið mitt, hvar er vatnið? Þú fórst að sækja vatn og enn bíð ég hér eftir þér. Þú hefur verið rétta hálfa klukkustund í burtu.” “Hálfa klukkustund???” Tólf ár höfðu liðið og allir þessir atburðir samt gerzt á hálfri klukkustund. Þetta ku vera gott dæmi um svokallað maya, sem yogunum verður tíðrætt um. Skemmtilegar eru formúleringar Þórbergs um maya, sbr. Mitt rómantíska æði, bls. 39-54, en þar er handrit að fyrirlestri sem hann hélt í kringum 1920, um blekkingu efnisheimsins.

Lífið er kannski kaupstaðarferð, en er kaupstaðarferðin maya?

Flokkur: Bloggar | Breytt s.d. kl. 00:50 | Facebook

Athugasemdir

Góðar pælingar um miðja nótt. Nú dreymir mig eitthvað ógurlega spennandi. Takk fyrir það, elskan mín.

Guðríður Hrefna Haraldsdóttir, 3.6.2007 kl. 03:44

Var ad skoda skissurnar mínar og zar er hrútur sem ratadi ekki heim .... var kanski í sinni einu kaupstadaferd .... Áhugavert! Nú er ég nývöknud og man ekki einn draum e. átök naetur.

www.zordis.com, 3.6.2007 kl. 07:31

Mikið er gott að koma hér í heimsókn, þurfa engann miða, koma í algleymi morgunsins og bara njóta. Ljóðið þitt neðar grípur mig og myndirnar bæta við blöðum í bókina mína. Danmerkurferðin var yndisleg, einkum heimsóknin til eyjarinnar Ven (Hven). Alveg unaðsleg náttúruperla. Svaf samfleytt í 12 tíma eftir heimkomu. Eigðu yndislegan dag elsku vinkona.

Unnur Sólrún (IP-tala skráð) 3.6.2007 kl. 09:13

Já ég hef Þetta stundum sterkt á tilflinningunni að ég sé að gleyma einhverju mikilvægu sem ég kom til að gera...bara finn ekki miðann og man heldur ekki hver sendi mig. Nema ég hafi bara sjálf sent mig og þá þurfi ég ekki miðann því innan í mér sé það skrifað sem ég átti að sækja..nú eða koma til skila.

Katrín Snæhólm Baldursdóttir, 3.6.2007 kl. 11:23

Frábær lesning. Eldri sonur minn sem er 21 árs er mikið að stúdera Krishna og sjálf hef ég lesið mikið og stúderað "óravíddir alheimsins". Maya er hluti af mínu lífi. Stundum legg ég upp í löng ferðalög en kem svo til baka og þá eru bara liðnar nokkrar mínútur