O tempora, o mores

Konan bráðunga á kassanum í Hagkaup horfði rangeygum augum á manninn, sem var að kaupa fimmtán borðtuskur og þrjátíuogþrjá skyr-desserta. Eiginlega horfði hún ekki á manninn, heldur á vegginn fyrir aftan hann. Maðurinn svaraði þessvegna ekki þegar stúlkan sagði: “sessúsundfjötjoþrár”. Hann hefur aukinheldur ekki skilið þetta uml.  Konan fyrir framan sem var enn að raða snyrtilega í pokann sinn (greinilega á einhverfurófinu eftir röðunaráráttunni að dæma) túlkaði upphæðina fyrir manninn og þá áttaði hann sig og reiddi fram peningana. Þegar kom að mér, horfði rangeyga stúlkan í vegginn og sagði “gokvö” Hafandi skannað mína mjólk, ost, skyr, egg, steinselju og handspegil (herm þú mér), sagði stúlkan eins og ekkert væri sjálfsagðara: “Tolfúsundogduddugu”. Það tók töluverðan tíma að fá stúlkuna til að upplifa ósamræmi upphæðarinnar og steinselju-innkaupanna. Þá hún náði því, kallaði hún í strák á næsta kassa og sagði eitthvað óskiljanlegt. Ég spurði hvað væri á seyði. Þá sagði stúlkan: “Érbara a bíðeftir lykil”. Man einhver þá tíð, þegar afgreiðsludömur sögðu: “Var það eitthvað fleira fyrir yður?”

Athugasemdir

[www.zordis.com, 12.4.2007 kl. 22:25]

Yður er löngu gleymt og grafið ... farið í hafið .....

Mæ god!  Frú Gúðný Anna, það að þéra á spæsnku tekur í allar rásir ....... þar til kona eins og ég kvæsi að snilld og dáð á sjálfri mér fyrir að reyna!   

[Unnur Sólrún (IP-tala skráð) 12.4.2007 kl. 22:50]

Hvílík dásemdarfærsla hjá þér.  Ég var farin að óttast einhvern Þyrnirósarsvefn.  Já.  Þetta er sérstök lífsreynsla.  Það er makalaust að lenda í biðröð í Landsbankanum í Smáralind á laugardegi.  Þá eiga þessir duglegu útlendingar sem hér vinna hörðum höndum sumir frí og komast í bankann.  Þá heyrir maður varla íslenskt orð. Svo sannarlega breyttir tímar.  Dreymi þig eitthvað ljúft.

[Guðný Anna Arnþórsdóttir, 12.4.2007 kl. 23:08]

Já, yður er víst gleymt og grafið.

Þessi elsku unga stúlka var nefnilega alíslensk, það er nú málið.

Góða nótt, elskurnar, og munið að það er föstudagurinn þrettándi á morgun!

[Tómas Þóroddsson, 13.4.2007 kl. 06:08]

"Það tók töluverðan tíma að fá stúlkuna til að upplifa ósamræmi upphæðarinnar og steinselju-innkaupanna." klassasettning.