Af piparmeyjum og hrognum og lifur og fleiru ljúfu

Laugavegurinn hefur breyst í útlönd. Ég get svo svarið það að mér heilli og lifandi, að ég heyrði bara enga íslensku talaða i Bónus í Kjörgarði í dag. Ekki í biðröðinni, ekki á kassanum, ekki við samlokurekkann. Það var meira að segja maður sem sagði “ekskjúsmí” þega hann straukst undurlaust við mig á leiðinni í röðina. Það hefði aldrei hent Íslending. Útá götu töluðu líka allir einhvuss lags útlensku og sumir stóðu í hópum og bentu. Augnablik fékk ég óraunveruleikatilfinningu. Hrökk í gang þegar maður sagði við mig: “Nei, heil vertu heillin, erðetta ekki hún Guðný litla Arnþórs og Göju í Pöntun? “ Þar var þá kominn gamall kunningi pabba og mömmu frá fornu fari. Ekki gat það verið íslenskara. Og þekkti mig í útlendingafans á miðjum Laugavegi. Það kalla ég gott af 86 ára manni að vera. Það var skemmtilegt að rifja upp með honum ýmislegt skondið og skemmtilegt. Gamalt fólk er svooo skemmtilegt!Ég leit reyndar út eins og áttræð piparmey í dag. Er ekki að djóka að það var það sem mér datt í hug þegar ég leit í nýjan spegilinn á skrifstofunni minni. Mér datt líka í hug ryðguð biblíumynd, eiginlega var myndin svona sambland af báðu. Ég var farin að dauðsjá eftir að kaupa þennan guðs volaða spegil. Verð að fara að kaupa mér krem frá La Praire eða La Mer.

Ætlaði mér í kvöld að horfa og hlusta á eldorgel á Austurvelli, en var svo heltekin af nýrri og versnandi sjálfsmynd minni, þegar heim kom, að ég hætti við að fara. Vænti þess að njóta Safnanætur á morgun, það finnst mér skemmtilegt fyrirbæri, naut þess í fyrra og hitteðfyrra. Ég elska Reykjavík afskaplega heitt (og ekki síst Laugaveg) eins og ég hef víst margtuggið. Mér varð einmitt á að hneyksla vin minn ærlega í dag, þegar ég sagði honum í óspurðum fréttum að mér fynndist miklu skemmtilegra að fara í gönguferð um Laugaveg og Skúlagötu en Heiðmörkina. Þetta þykja helgispjöll. Þessi sami vinur minn tjáði mér að frændi hans hefði nýlega nefnt tvíburana sína kornunga, Hrogn og Lifur. Þetta eru stelpa og strákur, ætli það sé þá strákurinn sem heitir Hrogn? Hefði Hrognkelsi ekki verið nær? Öllu lætur maður nú ljúga í sig.

Athugasemdir

[Guðrún Eggertsdóttir, 22.2.2007 kl. 23:03]

Hahahahaha, það sem fólki dettur í hug, hrogn og lifur - ekki nema það þó!

[Greta Björg Úlfsdóttir, 22.2.2007 kl. 23:20]

Frændi minn sagðist alltaf myndu skíra börnin sín Pott og Pönnu - hann stóð nú ekki við það, trúlega hefur móðirin ekki samþykkt þessi nöfn.

[Guðríður Hrefna Haraldsdóttir, 22.2.2007 kl. 23:56]

Heheheheheheheh! Frábær dagur greinilega, nema þetta með fjandans spegilinn! 

[Jón Steinar Ragnarsson, 23.2.2007 kl. 02:57]

Ég er að hugsa um að skýra börnin mín Nál og Tvinna.

[Guðríður Hrefna Haraldsdóttir, 23.2.2007 kl. 09:11]

Mín börn munu heita Skinn og Hörund ... eða Skip og Bryggja! Snilld er þetta!!!

[Guðný Anna Arnþórsdóttir, 23.2.2007 kl. 23:05]

Já, sveimér ef ekki bara Gög og Gokke.

Já, Guðmundur, ég vil sem alþjóðlegtast Ísland og sem íslenskast alþjóðasamfélag, if you know what I mean.  Aðhyllist blöndun af öllu tagi, held að það sé affarasælast þegar á heildina og til lengri tíma er litið.

Takk fyrir kommentin, öllsömul, kæru vinir.